ယနေ့မနက် ပြင်ဦးလွင် တပ်မတော်နည်းပညာတက္ကသိုလ်ကို လက်နက်ကြီးများဖြင့် တိုက်ခိုက်ခံရ

မန္တလေးတိုင်းဒေသကြီး ပြင်ဦးလွင်မြို့ရှိ တပ်မတော်နည်းပညာတက္ကသိုလ် (Defence Services Technological Academy) ကို ဒီကနေ့မနက် ၅ နာရီ မိနစ် ၃ဝ လောက်က လက်နက်ကြီးနဲ့ ပစ်ခတ်တိုက်ခိုက်ခံရပြီး လူတစ်ဦးသေဆုံး နှစ်ဦး ဒဏ်ရာရခဲ့တယ်လို့ RFA က စုံစမ်းသိရှိရပါတယ်။

ဒီတိုက်ခိုက်မှုမှာ လက်နက်ကြီး ခုနှစ်လုံးလောက်အထိ ကျရောက်ပေါက်ကွဲခဲ့တယ်လို့လည်း သိရပါတယ်။

နည်းပညာတက္ကသိုလ်ကျောင်းအုပ်ကြီးဖြစ်သူကို ပစ်မှတ်ထားတိုက်ခိုက်တယ်လို့ ကနဦးသတင်းတွေ ထွက်ပေါ်ခဲ့ပေမယ့် နောက်ပိုင်းရရှိတဲ့သတင်းရင်းမြစ်တွေအရ တိုက်ခိုက်မှုဟာ ကျောင်းတွင်း အဆောင်နေရာအများစုကို ကျရောက်ပေါက်ကွဲခဲ့တာလို့ ဆိုပါတယ်။

တိုက်ခိုက်မှုကြောင့် အရပ်သား ထမင်းချက်တစ်ဦး သေဆုံးပြီး ကျောင်းအုပ်ကြီးရဲ့ ကိုယ်ရေးအရာရှိနဲ့ ဇနီးဖြစ်သူတို့ ဒဏ်ရာရရှိပြီး ဆေးရုံကိုပို့ဆောင် ကုသထားရတယ်လို့ ဒီဖြစ်စဉ်ကို သိရှိသူတွေက RFA ကို အတည်ပြုပြောကြားပါတယ်။ ဒါ့အပြင် တက္ကသိုလ်အတွင်းက လူနေဆောင် ခေါင်မိုးတွေ အများအပြားပျက်စီးခဲ့သလို မော်တော်ယာဉ်တွေလည်း ထိခိုက်ပျက်စီးမှုရှိတယ်လို့ သိရပါတယ်။

ပစ်ခတ်သူလက်နက်ကိုင်တွေရဲ့နောက်ကို တပ်မတော်စစ်ကြောင်းတွေက လိုက်လံရှာဖွေ ရှင်းလင်းနေပြီး၊ နောင်ချို-ဂုတ်တွင်း ဂိတ်မှာလည်း တိုက်ပွဲတွေ ဖြစ်ပွားခဲ့တယ်လို့ တပ်မတော်နဲ့နီးစပ်သူတချို့ရဲ့ လူမှုရေးစာမျက်နှာ ရေးသားချက်တွေအရ သိရပါတယ်။

အခုလို တိုက်ခိုက်တာဟာ ရှမ်းပြည်နယ်မြောက်ပိုင်းအခြေစိုက် TNLA တအာန်းလွတ်မြောက်ရေးတပ်မတော် လက်ချက်ဖြစ်တယ်လို့ တပ်မတော်နဲ့ နီးစပ်သူတွေက စွပ်စွဲပြောဆိုနေကြပြီး RFA အနေနဲ့ သီးခြားအတည်ပြုနိုင်ဖို့ ကြိုးစားနေဆဲဖြစ်ပါတယ်။

ပြင်ဦးလွင် တပ်မတော်နည်းပညာတက္ကသိုလ် တိုက်ခိုက်ခံရမှုနဲ့ ပတ်သက်ပြီး တပ်မတော်သတင်းမှန် ပြန်ကြားရေးအဖွဲ့နဲ့ မျက်မြင်သက်သေတွေရဲ့ အတည်ပြုချက်တွေရရှိဖို့အတွက် RFA က ဆက်သွယ်ဖို့ ကြိုးစားနေဆဲဖြစ်ပါတယ်။

အထူးသတိပေးချက်   15.8.2019 6am ယနေ့နံနက်ပိုင်းအချိန်ကဂုတ်တွင်း၌၎င်း ကျောက်ကြမ်းရွာအနီး၌၎င်းတိုက်ပွဲများဖြစ်ပွားနေပြီးလက်နက်ကြီးပစ်ခတ်မှုများပင်ပါဝင်ကြောင်းကြားသိရပါသည်။ဂုတ်တွင်း၌အခြေအနေဆိုးသည်ဟုသိရပါသည်။နောင်ချိုတိုးဂိတ် ဘန့်ဘေးတိုးဂိတ်တို့တွင်ကားများကိုခေတ္တတားထားပါသည်။အခြေအနေပြန်တင်ပေးပါမည်။ယာဉ်မောင်းများခရီးသွားများအထူးသတိရှိပါ။

နောက်ဆုံးရသတင်း  15.8.2019  7am နောင်ချိုအောက်ဘက်ရှိမူးယစ်စစ်ဆေးသည့်နေရာမီးရှို့ ဖျက်စီးခံရပြီးနောင်ချိုတိုးဂိတ်ကိုလက်နက်ကိုင်အဖွဲ့တွေကထိန်းထား၍ဝန်ထမ်းတွေပိတ်မိနေပါတယ်။လက်ရှိဂုတ်တွင်းမှာပစ်ခတ်မှုတွေဆက်တိုက်ဖြစ်ပွား နေပြီးဂုတ်တွင်းတံတားကတော့အန္တရာယ်ကင်းနေပါသေးတယ်။နောင်ပိန်ဇီးပင်နားမှာလည်းပစ်ခတ်မှုတွေဖြစ်နေလို့ကားတွေပိတ်မိနေကြောင်းကြားသိရပါတယ်။

(Photo: Defence Services Technological Academy)

Source : RFA

Facebook Comments

admin

error: Content is protected !!